Shablono:Eventi
dum junio:
50, 100 e 300 yari ante nun …
3 di junio 1973. Ye l'aero-expozo di Paris, la duesma produktita Tupolev Tu-144 destruktesis en acidento, qua mortigis omna sis homi en l'aeroplano, ed ok spektanti. L'aeroplano esis desegnata en USSR da la desegno-kontoro di Alexei Tupolev, por eventuala utiligo da la kompanio Aeroflot. La prototipo unesmafoye flugis ye 31 di decembro 1968. Ye 5 di junio 1969 ol unesmafoye flugis plu rapide kam sono; ol flugis ye duople di la rapideso di sono ye 26 di mayo 1970. Developado esis tardigata pro l'acidento ye l'aero-expozo di Paris. Komercala flugi por pasajeri komencis en novembro 1977, de Moskva ad Alma-Ata.
10 di junio 1923. En Hendaye, Aquitania, la skriptisto Pierre Loti mortis. Il naskis en 1850; ilua originala nomo esis Julien Viaud. Il havis navala kariero, e vizitinte la sudala Pacifiko il skribis Polineziana idilio Le Mariage de Loti (1880); sur ca rakonto fondesis l'opero Lakmé da Léo Delibes. Lua voyaji kom navala oficisto donis idei di plura skriburi, fiktiva e faktala. En 1883 aparis mi-autobiografiala romano Mon Frère Yves, qua deskriptas la amikeso di Franca navala oficiro ed ebriema Bretona maristo: ol divenis ilua maxim bone konocata romano. En 1886 aparis ilua romano pri la vivado di Bretona peskisti, Pêcheur d'Islande. Il esis elektata en 1891 a la Académie Francaise.
16 di junio 1723. En Kirkcaldy, Skotia, la filozofo ed ekonomikisto Adam Smith naskis. Il esis profesoro di etikala filozofo en Glasgow de 1752 til 1763. Ilua libro pri ekonomiko, La Richeso di la Nacioni ("The Wealth of Nations"), unesmafoye aparis en 1776. La unesma edituro di la libro esis par-vendita pos sis monati, e quar plusa edituri aparis dum la vivo dil autoro. Ol esis influiva por ekonomikisti en sequanta yari. Smith skribis pri ekonomikala libereso, divideso di laboro e libera komerco, ed opinionis ke guvernala interfero esas ne-necesa.